افتح زنزانتك
خلي القلب المكسور فوق النعش
يفتح بابه يتشعلق ويشم النور
انا سمكه جريحه هربانه من صيادها
مرميه وسط بحور
والنار بتفتف كل ضعيف
لا يحوق فيها شتا ولا صيف
انا قلبى متقشر زى قشر الرمان
يتلون ميت لون فى اليوم
يتسنكح ويا السناكيح
اراجوز يتنطط باع طرطوره
وبقى م الاعيان
وقلوب حواليا ساكته
زى سكون الليل
جواها الف خريف
بتشوف زى العميان
افتح زنزانتك
خلى ايديك منشار يشق الليل
وتولع جوه العتمه الف صاروخ
افتح دواليب الحب لبكره
خلى غيطان الحب الناشفه
من بقها تطلع تانى التفاريح
والقلم المكسور تانى
يكتب بايديه الشقيانه
احلى حروف
شيل الاحزان من زنزانتك
وادفن جواها الخوف
افتح زنزانتك
خلى العالم يعرف مين هو سعاتك
وارسم عصافير بتطير
شايله على منقارها ياقوت وحرير
دور على نفسك
صحيها لو نايمه جوه كراستك
واخلع توب اوهامك من على شماعتك
خلى الفرحه عروسه بطرحه تدخل من شباكك
ودبيب العافيه يدب ويشب فى ايامك
وتدوس على جته احزانك
وتشوفها نوايا تتفصص
جوه الريح مشقادره تفلفص
وتوبك الاخضر عصفور بيعدى
السور ولا يتعفص
القطر واقف فى السكه فى انتظارك
مستنى تصحى م النوم
فوق السكه تنور تانى اشارتك
افتح زنزانتك
بقلمى / رضا البوشي
ليست هناك تعليقات:
إرسال تعليق