الشاعر رضا البوشي
(زي النهارده كان هوانا )
الفجر شقشق من نور عنيكي
والورد فتح في نجوم سماكي
والقلب لما إشتاق إليكي
شاف الحياة في ثانيه معاكي
عمري اللي راح قبليكي
حتى السنين العجاف
خليتني اخاف احبك
واتعود عليكي
انا لما شفتك الدنيا جاتلي
لحد عندي
و الحياة لأول مره انا شفتها
والحزن سافر للفضا
حتى الآهات سابتني قبل ما اقولها
وتغيرت كل الأماكن
حتى البشر بقى ليها طعم ولون
ونا بحضنك
ضاع من شفايفي طعم المرار
وصحيت على صوت النهار
ورجعت زي الطفل
أكتر م الأول بعشقك
فاكره زي النهارده كان لقانا
فاكره زي النهارده كان هوانا
لو كنت ناسيه افكرك
فوق خد الرمل َمكتوب اسامينا
بتتوه من صوابعنا السنين
ولا تهنا عن بعضينا
فوق جنه الأحلام
بنينا عشنا ألاخضر بلون الورد
واشواقنا قد المحيط والنيل كمان والسد
أصل هوانا زي الوشوش والوحوش
كتير ولا ينعد
فاكره زي النهارده كان هوانا
فاكره زي النهارده كان لقانا
وإن كنت ناسيه أفكرك
عارفه أحلى حاجه حصلتلي هو انتي
و إن عيونك سمايا وقمرايا فيها مدينتي
طب اعمل ايه لو يوم رحلتي
وخبط على بابي الغراق
هقول لمين بعدك حبيبتي
لما ياخدني الإشتياق
فاكره زي النهارده كان هوانا
فاكره زي النهارده كان لقانا
وإن كنتي ناسيه افكرك
لو تسمحيلي
أشم عطرك اتنفسك
وأرسمك تمثال محبه في معبدي
واحنطك جوه في وريدي
لو تسمحيلي
مره واحده أحضنك
وترجعي الزمن اللي فات
وترجعيني
يوم لقانا كان الوقت متأخر
عدي النهار والعيد كمان عدى
لكن هوانا كان ميلادي
ولقانا كان يوم عيدي
زي النهارده
ليست هناك تعليقات:
إرسال تعليق