دين ولازم تدفعه
زمان كنت بسمع من اللي ماتو
الله يرحم كل اللي ماتو
كله ياابني سلف ودين
اللي جرحو واللي عابو
بكرة هنبقي المعيوبين
واللي فاكر تاريخ ميلاده
بكرة هيبقي من المفقودين
كله في الاخر يسدد
كله مكتوب فوق جبين
واللي خان
واللي باع الدم مرة
واللي عاش طول عمره ظالم
عمره مايحس المظلومين
واللي دايما كان بيجرح
ازاي يحس المجروحين
هو دين لازم تسده
عشان نموت مستورين
اخ وباع رخيص اخوه
وابن فاكر أن الرجوله
تكمل لما يموت ابوه
والبريء بيموت في سجنه
والجاني بيتأسفوله
ومن العجينة يخرجوه
والغريبة لما تغلط
كل يجري
كله ماسك سكينه حاميه
زي الضحيه بيدبحوه
اللي واخد علي الرخص عمره
ماهيلاقي اللي يشتروه
واللي عاق امه وأبوه
بكرة عياله هيسحلوه
واللي ناكر الخير بطبعه
هيجي اللي ينكروه
واللي شاب
واللي خاب
واللي ساعد في الخراب
واللي اسمه قبل ابوه
هو دين لازم تسده
أصله زي النهارده ليك
بكرة لازم يكون عليك
احمد عبدالحق
ليست هناك تعليقات:
إرسال تعليق