خواتي و إخواني بإدارة المجلة
أخواتي و إخواني رواد هذا المنبر الراقي .
يسعدني و يشرفني أن أجتمع بكم ( إدارة و روادا ) على مائدة أدبية تحتوي على نص زجلي ( العامية المغربية ) تحت عنوان " الصبر دبر " من ديواني " ودفنت قلبي معك..." أرافقها بغلاف الديوان . ديوان ألفته وفاء و عرفانا لروح زوجتي تغمدها الله برحمته .
لا أحزنكم الله جميعا و حفظكم و حفظ ذويكم من كل مصيبة
" الصبر دبر "
يا ليمني على قلة الصبر
شوف حالي لي دام ونظر
كن فاهم و عاقل وتبصر
كيف الدنيا عطاتني بالدبر
عذبتني ف لولادة والصغر
وما رحماتني حتى ف لكبر
ولا قلبها حن وأنا كنعتر
لا أم داويني من جرح الظفر
ولا حبيب ولا خو كلشي نفر
ولا ونيس ولا حتى طير صفر
يروح يغني ويحمل ريحة الشجر
ينعسني بشداه حتى يطل لفجر
ويبدل دخان عليه كنقصر
ك يهزني لسما ويرميني ف لبحر
أو بينهم ما عرفت ما نقدم ما نوخر
ما كاين هنا و لهيه غير لمكر
سول حتى لبكم بلا لسان يهدر
عقلي ما تبت، ديما هايج ومحير
داوتو بالعشوب وحتى السم لمقطر
لعشوب شمتها هوى مبخر
والسم شربتو ف كاس معصر
من طولهم ، الدوى ما نفع وخسر
سعدي عايش ف ظلمة ما تغير
شكون لي يرد علي ف الذكر
كيف يمكن لي ما نبكي ما نفكر
الضحكة مشات والنشاط هجر
النهار تخمام أ ف ليل نوسد لحجر
داز علي نور بعد دقيقة أدبر
ظنيتو طبيب لعلتي مبشر
لكن غاب ضوو بلا ما يخبر
ولا حتى يسلم مشى بلا ما يعبر
على حيط علقت خيالو مسمر
أو هو بلسانو شكر، أ بنابو نقر
ف رحبة القلب عندو جبل محجر
وأنا ما نقول كذوب ولا كلام معكر
ما بغيتو يرجع،كاس تهرس ما يتجبر
شقايا مزمم ف كتاب مقدر
حيت ، لي درت ، ما عندي زهر
عفاك ،لا تطلب مني صبر
راه وجعو وصل لعظم بالدبر
ولي يدو ف الماء مشي بحال الجمر
غيرسير، أ خليني مجاور لقبر
بوحدو عارف حزاني من لبكر
نقرى عليه شعار كتبتها بحبر
مصيتو من عروقي دم أحمر
أ بقلم مضى من رأس الخنجر
على لوحة حياتي ، بان مسطر
حميد الصنهاجي
مكناس - المغرب
ليست هناك تعليقات:
إرسال تعليق