كان زمان
""""""""""""
أول ما شوفتك
شئ غريب شدنى ليكى
ما أعرفش إسمك
لكن قلبى هتف بيكى
وحس فى عينيكى الأمان
وقالى سميها حنان
*****
من بعيد بأبعت سلام
وأتكلم من غير كلام
وأستغرب فعل الزمان
و أقول لنفسى كان زمان
*****
أشوفك أفرح وأطير
وتشم أنفاسى العبير
روحى خلتنى أسير
وقالتلى سميها عبير
*****
وأسألك من غير سؤال
هاتحيى فى روحى الآمال؟
وترجعى أيام زمان!
تقوللى نفسى كان زمان
*****
قلبى لروحى وشا
وعينيا سماتك رشا
قوام غزلان
وعرفتى تسهرى عينى
مع طيفك تخلينى
أبات سهران
أفتكر أيام زمان
وأقول لنفسى كان زمان
*****
وقدرتى تشغلى عقلى
وأنا عقلى كله إباء
تاه فى جمالك وفاقلى
وقالى سميها صفاء
*****
مش هى إللى حركت شوقك؟!
ولقيتها بتجرى فى عروقك!!
سألت روحى لما حسيتك
أكون بعينيا حبيتك؟!
*****
بعد حبى الأولانى
لا المكان أصبح مكانى
ولا الزمان أصبح زمانى
معقول ها احب تانى؟!
هو إحنا ها نعيد إللى كان؟!
وتقولى نفسى، كان زمان!!!!
من ديوان
أم الدلال
شعر / سيد فتح الله
ليست هناك تعليقات:
إرسال تعليق