الشاعر / رضا البوشي
تعالى زورني
أجيبلك إيه يا مايا
في عيد ميلادك
هاتلي يابني قهوة سادة
برشام سعادة
ينسيني بعادك
وأبعت صوابعك في الليل
تتطمن عليا
في رسالة حط فيها طلتك
تتكحل بيها عنية
القلب بعدك انكسر
بقى حد تاني
والشقا حاوط بيباني
حتى كلمة يابني
إنحرم منها لساني
فينك يا ابن عمري
لما الحنين يشتد
ورد اية ضعيفة مرمية
في حضن البرد
فاكرة لما كنت بصرخ
وإنت بتضحك جوة بطني
فاكرة اول مره وقعت فيها
وانت نونو لسه بتحبي
أول رسمة فوق كراستك
كانت حضني
لما بترجع من مدرستك
اول كلمة كانت أمي
من دقة جزمتك فوق البلاط
من خبطتك عالباب
أنا كنت يابني بعرفك
وزي كفى كنت عارفه ضحكتك
كنت ضلي اللي باقيلي
من بواقي الليام
كنت شمعة بصحي عليها وانام
مهما البعاد غير ملامحك
إلاشتياق راح يقطع حبل جرحك
وأما تخبط يوم عالباب
قلبي اللي فايتة راح يفتحلك
َمستنياك جنب الباب
يمكن تغلط يوم وتعدي
كل صورك وانت صغير
نايمة معايا فوق مرتبتي
وما فيش أم بتنسي ضناها
إغلط مرة تعالي وزورني
ليست هناك تعليقات:
إرسال تعليق