حاسب من الصاحب
كلمات هانى فَتُّوح
لفيت سوق الصحاب
لاقيت الصحاب أنواع
صاحب جدع و أصيل
فى الشدة حمل يشيل
همك بدون ما يميل
العيش و الملح دستوره
و العشرة عهد بيصونه
سرك معاه مدفون فى بير
مهما كان سرك خطير
راجل وقت الشدة سداد
وفى غربتك مايه وزاد
مخلص ويخاف على زعلك
وإن يوم زعتله هايسمحك
-------------
وفيه صاحب قليل الأصل
مالوش عند الأطباء مصل
الغدر طبعه و الطمع عنوانه
مغرور وأنانيته إدمانه
يكرهلك الخير ولا يحلك
من حقده ويدلك على يضلك
الكدب لبانه فى لسانه
يجى ايه فى إبليس و أعوانه ؟
أهم حاجة مصلحته
وإن عوزته يظهر ويبان على حقيقته
لا تقوله فى يوم على سرك
ولا تأمنه على بيتك ولا عرضك
-----------------
لفيت سوق الصحاب
أدور على صاحب
يصاحبنى على حالتي
ومايكونش له مطالب
يخاويني ويشيلني
وقت الحساب نتحاسب
سوق الصحاب أشكال و ألوان
صاحب أصلى و صاحب تايوان
صاحب جعان و صاحب شبعان
صاحبت ياما أصحاب جدعان
من إسكندرية لحد أسوان
إلي إشترانى و شالني زمان
هكون له ستر و غطاء و أمان
نصيحة يالي عايز أصحاب
صاحب أصيل ولامية كلاب
صاحب أصيل ولا مية كلاب
ليست هناك تعليقات:
إرسال تعليق