غِبت وسِبت مكان فى القلب
لسه مازال من بَعدك فاضي
يحرم يوم على قلبي الحب
وقلبي بغيرك مابقاش راضي
أصل غيابك بالنسبالي
شئ ماخطَرش في يوم على بالي
ولا فكّرت أكيد فيه يوم
أه لو تعرف اللي جرالي
حالي في بُعدك مابقاش حالي
وبَعدك عيني خاصمها النوم
كنت مفكّر يعني يومين
وإني هكّمل بعدك عادي
غِبت وسِبت مكان في القلب
لسه مازال من بَعدك فاضي
غِبت وسِبت العقل في حيرة
ليل ونهار دايماً مشغول
لمّا مشيت حاسيت بالغيرة
خايف يعني البُعد يطول
صورتك جانبي مافارقتنيش
حتى الوقت ما بيعدّيش
قوللي إزاي من غيرك أكمّل
وإزاي بعدك هقدر أعيش
لسه مكانك فاضي بجد
وقلبي مازال شايلك جواه
صعب حقيقي يكون فيه حد
يقدر يعني في يوم يملاه
لأ صدّقني كمان والأصعب
لا أنا عارف أبعد ولا أقرّب
ولا عارف أوصل لمكانك
ولا عارف م الفِكر أنا أهرب
بقلمي عبدالحميد وهبه
ليست هناك تعليقات:
إرسال تعليق