جانب المقام وسط الزحام
أنا واقفة بدعي ربنا
ترجع آوام ليا بسلام
وألقاك كمان جانبي هنا
حساك كأني إبني وتاه
في الزحمة مني من سنين
سابني وأخد الروح معاه
مش عارفة تاني هشوفه فين
قولت أما أروح جانب المقام وأستنظرك
جايز هناك أعرف إيه عني أخّرك
أو إيه اللي خلّاك غِبت عني بدون سبب
وإيه اللي فجأة عليا يعني غيّرك
جانب المقام رافعة الإيدين
بدعي الإله ترجع بقى
حاسة البعاد أصبح سنين
م أنا روحي بيك متعلّقة
وكل يوم رايحة وبطوف
ولا حاسة لا بخوف أو تعب
جايز في يوم تصدف وأشوف
أو حتى أعرف إيه السبب
جوة المقام خدني الحنين
ودعيت وأخلصت الدعا
وكتبت بإيدي جملتين
على ورقة كات متقطّعة
جملة بقول لو كنت حي
هحاول أصبر ع الفراق
وجملة لو مابقتش جاي
هقتل في قلبي الإشتياق
بقلمي عبدالحميد وهبه
ليست هناك تعليقات:
إرسال تعليق