م النهاردة خلاص راح أرفض
إني أفضل حيطة مايلة
مش هقضّي العمر كله
في التراضي وفي المحايلة
م النهاردة كل واحد
صار خلاص ملزوم بشيلتُه
ع الأقل هيبقى شاهد
لمّا تبقى الخيبة خيبتُه
أمّا أنا كفاية عليا
هَمّي وسنيني اللي جاية
مش هعيش دايماً ضحية
للي صاروا خلاص عتاولة
م النهاردة خلاص راح أرفض
إني أفضل حيطة مايلة
هو صار يعني إعتيادي
في الهموم أصحى وأبات
م النهاردة و م السعادي
المعاملة خد وهات
يعني هتقدّر هقدّر
كل حاجه شبيهّا وأكتر
لو في نفسك يوم تفكّر
يبقى نَفسي بيّا أولَى
م النهاردة خلاص راح أرفض
إني أفضل حيطة مايلة
أيوه قدّمت الكِتير
في النهاية خدت إيه
قلب قالوا عليه كبير
كله دايماً جاي عليه
قلبي أعلن م النهاردة
إنه صعب بظلمُه يرضى
واللي جاي غير اللي عدّى
وكفيانا خلاص مجاملة
م النهاردة خلاص راح أرفض
إني أفضل حيطة مايلة
بقلمي عبدالحميد وهبه
ليست هناك تعليقات:
إرسال تعليق