قصيدة باللهجة العامية اللبنانية
إعادة نشر نزلوا عند رغبة بعض الأصدقاء .
يمكن غلط
يمكن غَلَط ها لوقت حاكيك
يمكن غلط علِّق عيوني فيك
ويمكن غلط عم تضحك وبكِّيك
يمكن غلَط
يمكن غلط بعد البعد
بعد الوعد أنُّو نرجَع لبعض
ويبقى الورد بإيدي عم يناديك
يمكن غلط
يمكن غلط عم عيش أيامي مَعَك
عم شمَّك وعم بقشَعَك
بس الغلط كل الغلط
إنك معي ومضَيّعَك
عم عيش وما لاقيك
يمكن غلط
عم عيش وإتأمَّل نرجع سوا
ونعيد من الأوَّل
نسرق ضحكة من هالدِني
ونعيش وما نسأل
عقلي فهِم إنُّو خَلَص
بس القلب طَوَّل
يمكن عمر ، يمكن دهر
يمكن بعد موتي بشهر
يمكن ما يرضى يقتنع
وعنَّك ما يتحوَّل
يمكن قهر ويمكن شعر صرلو عمر
معوَّد بدونك ما يكمِّل
ويمكن غلط إبقى
أنا وقلبي على ماضيك
بس الغلط كل الغلط
إنك معي
عم عيش وما لاقيك .
د.أنور مغنية 2025 03 24
ليست هناك تعليقات:
إرسال تعليق