ياللي ماشية
ياللي ماشية وسايبة قلبي
فايتة عشق مالوش مثيل
واخدة مني عين ونني
سايبة دمع العين يسيل
دانتي قلبك حته مني
مين سمحلك بالرحيل؟!
بتقوليلي بكره تنسى
لما تلقى ف يوم بديل
مركِبَك دي مسيرها ترسى
تلقى شط عليه تميل
أنسى إيه والله مانسى
ايوه صعب ومستحيل
أنسى كلمه ف ليل وهمسه
لما تتقال تمحي ويل
أنسى لمسه ف قلبي ماسَّه
كان حاسسها من الحرير
عمر قلبي ما يوم هيأسى
أو يكونلك فيه بديل
دانتي عايشة ف قلبي لسه
ده اللي بينا غرام كبير
مركب إيه اللي مسيرتها ترسى؟!
شط إيه اللي عليه تميل؟!
دي الحياة بعدك ما تسوى
زي سجن وفيه أسير
ليه تسبيني وتبقي آسية
عمري أعيشه ف ليل طويل
ارجعي ده العمر لحظة
ليه نعيشه جراح وويل
بقلمي/ خالد جمال ٤/٦/٢٠٢٥
ليست هناك تعليقات:
إرسال تعليق