خط أحمر
مايتبلِّش ف بُقك فوله
باشواقنا تبوح بسهولة
حبيبي يا ريت ما تتكلمش
على غرامنا لدول أو دولا
بروح صافية وقلب سليم
بتحكيلهم عشان بتهيم
جايز فيهم ثنائي الوش
نفوس جافية قلوبها جحيم
ليه تشغلهم بحالنا وبينا
ف أفراحنا يأروا علينا
وأي خلاف ما بينا وتاتش
هتلقاهم بيشمتوا فينا
ماتفرقشي غريب وقريب
دي نواياهم ف علم الغيب
عشان نرتاح مانتندمِّش
على نفوسنا نجيب العيب
بيتمنوا زوال النعمة
وحبك ليا أكبر نعمة
ولا تصرح ولا تلمحش
ولا تعرَّف بصير أو أعمى
عايز عشقك يحسه الكون
وبيه تتباهى وسط الكون
تعالى احكيلي قول ماتخافش
أنا اسمعلك بكل الكون
هوانا يا عمري خط أحمر
وبالكتمان يعيش أكتر
غرامنا وشوقنا بِنَّا وبس
نحاجي عليه عشان يكبر
خط أحمر
بقلمي/ خالد جمال ٩/٦/٢٠٢٥
ليست هناك تعليقات:
إرسال تعليق