ده حبيبي هواه حسب الرايجة
كده تَبَع الموود حسب الحالة
يعني أما تكون بغزالة رايقة
تنطق وتقول أحلى قوالة
وعاديك لو كانت متضايقة
تنسى الأشواق وبتتعالى
فيه بينا خطوبة وفيه شبكة
والمهر بعته أنا ف حوالة
مش باقي يا ناس إلا الورقة
واتنين يشهدوا م الرجالة
لو يوم كت صاحية ومش فايقة
ولسوء بختي كان فيه زيارة
تنكرني تقول أنا مش فاكرة
ترقع وبصوت يملى الحارة
تمنعني ان ادخل وتقوللي
على فين يا خفيف هيه وكالة
ودي أول مرة تشوف وشي
لو مش كداب هاتلي قمارة
وإن يوم رحتله ودماغه عالية
يقابلني بلهفة وبحرارة
ويقوللي إزاي ده حصل مني
دانا ملكك دانا رهن اشارة
معلشي سامحني يا روح قلبي
مانا مش آسية ولا غدارة
شكلي اتورطت معاه ف حبي
وماظنش كده تبقى غزالة
اتاريه بيتعاطى حبوب رسمي
والعقل إن غاب ألف خسارة
وعليا بايه أظلم قلبي
ما كفاية الدنيا الدوارة
يوم تبعد عني ويوم جمبي
يوم واخده الجرعة ويوم لا لا 😃
بقلمي/خالد جمال ١٦/٦/٢٠٢٥
ليست هناك تعليقات:
إرسال تعليق