الكافيه
قاعد ف ليلة على الكافيه
سهران بشوقي وحيد
سارح خيالي بشرب لاتيه
وسلوتي التنهيد
فيه صوت سمعته
جاي من بعيد
بينده (سعيد)
شقلب كياني ماعرفشي ليه
رجعني طفل وليد
فيه حاجة غامضة شدتني لِيه
عمّالة فيّا تزيد
نساني حتى اليوم ده إيه
ده كأنه يوم العيد
رقة وأنوثة بسمعها فيه
وهيام يزيد ويفيض
دلع السنين!!
حنية إيه !!
ده ياريت تقول وتعيد
لقيت عنيا
ف ثانية إلا ثانية
هربانة مني
بتقوللي سيبني
رايحة تدور عليه
ده مالوش أثر
ولا حاجة عنه تفيد
شكيت ف نفسي
لا تكون هلاوس
أو أكون بجد مريض
فجأة التقتها!!
هلت عليه بخطوتها
بتعيد يا ناس تاني ندهتها
بحس هادي وصوت شجي
الطرحة دارت قصتها
آه من عنيها وبصتها
أكيد دي زقة رموش العين
عليا دي أكيد وصيتها
خدني الفضول إيه قصتها
ده جمال فتوة وعفيجي
قضت عليا
خطفت أوام قلبي وعنيا
ولا حد فيهم يوم نجي
دي دهب ولولي
والروح إليها مسلمة
من فيض جمالها وزهوتها
بسأل قالولي
دي تبقى يابني المعلمة
والقهوة دي كمان قهوتها
طلع كمان اللي إسمه سعيد
يبقى البعيد القهوجي
حسيت عنيها بتوعدني
والرعشة جت مسكت بدني
تاني يوم لقيت قلبي واخدني
ع القسم ف سجله المدني
غيرت إسمي بقى إسمي سعيد😀
بقلمي/ خالد جمال ١٧/٦/٢٠٢٥
ليست هناك تعليقات:
إرسال تعليق