قصيدة عايش ومش عايش
-------------
قالتلي بحبك..... وف لحظة
سمعي التقيل أصبح خفيف
صليت ودعيت وبوست يدي وش وضهر
وف الآخر اكتشفت إن نظرها ضعيف
بتحبيني على إيه ياحزينه؟...
لا شكل ولا هيئة رزينة
ده الناس لوشافتك ماشيه جنبي
هتقول.. ياحسرة....... على إيه
عيونك كانت فين... لما إخترتية؟
وإيه اللي عجبك فية؟
ما أنا اللي بنام بترابي
وأنا الشقيان اللي حضوري يشبه غيابي
لا أعرف أغير ف مشيتي وأتمخطر
ولا أعرف أهز في اكتافي وأتمنظر
بس انتي علشان نظرك ضعيف
افتكرتيني عنتر
أنا عايش ومش عايش
ظل مالوش ملامح
لكن لساني بعافر
مابين اللي جاي واللي رايح
يابت.. دآنا تايه في الدنيا
عُقد رخيص وإتبعتر
وبرغم ده كله....... أنا مش طمعان
ولا طالب غير ستر الحال مش أكتر
وآدي الموت واقفلي ع الباب
ومين هيبكي عليا
ماأنا أصلي ماليش احباب
جاي ياموت ومش فارق معاك الدور على مين
قولي ياموت ازاي بتاخد ارواح المساكين؟
خلاص........... مبقاش دمع ف العين
ولا أقولك.... تعالى خدني مع الرايحين
كلمات / محمود العارف علي
ليست هناك تعليقات:
إرسال تعليق