يا ريتني نسمة هوا
تسري ف عز الصيف
وتميل على عيونك
ولا تبقي زعلانة
يا ريتني حامي الحمى
فارس ف ايده السيف
ويموت فدا حصونك
ولا ثانية يتوانى
يا ريتني كلمة رضا
تتقال تكون ع الكيف
تزول بيها شجونك
وتعيشي فرحانة
يا ريتني قطرة ندى
ألوانها لون الطيف
سارحة على جبينك
م العشق هيمانة
أقدر أطول الفضا
أخطف نجوم الليل
وتلالي فوق كونك
ملكه وسلطانة
يا ريتني صوت ليه صدى
يسبق يشق الليل
وينادي مجنونك
م العشق آه يانا
أغطس لأبعد مدى
أجمع نفيس وأصيل
واهديها لعيونك
دانا روحي عشقانة
يا ريتني فرش وغطا
حاسك وشايلك شيل
وعيون عليكي تميل
علشان تنامي الليل
وعيوني سهرانة
بتقوللي حرانة
بقلمي/ خالد جمال ٦/٨/٢٠٢٥
ليست هناك تعليقات:
إرسال تعليق