عشقانجي وهعمل إيه ف نفسي
مانا بعشق كل ما هوّه جميل
وحاولت كتير أمنع نفسي
أو أحرّم قلبي يدوب ويميل
بلاقيني رجعت نسيت نفسي
وماليش عن نفس السكة بديل
مانا عشقي مسيطر على قلبي
وماليش على قلبي ياناس تأثير
دي الحاجة اللي بتفتح نِفسي
وتخلي الكون ف عنيا جميل
ومعاها يا ناس تشرق شمسي
من غيرها حياتي ف عتمة وليل
ازاي راح أشوف عين بتمسِّي
على قلبي بغمزة رمش كحيل
وماردش لو حتى بهمسي
يرضيكوا يقولوا عليا بخيل
وازاي تقابلني خدود وردي
فوق منها الخال بيقول مواويل
وعبيرها مالوش أوصاف عندي
يخطف لو بيني وبينهم ميل
ماحلمشي اقطفها أنا بيدي
والروح تتهنى بأحلى عبير
والبسمة اللي بتسحر قلبي
وبتمحي هموم ف الروح وتزيل
وشفايف فيها يتوه عقلي
وتاخدني لدنيا من التفكير
والقد اللي تملي يعدي
علشان يشغلني ف لحظة واميل
ويفوت ادامي أما يهدي
ويسيبني لحسنه يا خلق أسير
والشعر اللي معاه بيوعدني
لو شفته على الخدين بيطير
ويقوللي يا ريت تيجي تبعدني
بايديك لاطرف لحبيبك عين
عشقانجي يا ناس غصبن عني
من غير تبرير شرح وتعليل
عشقانجي ورايحة الروح مني
ورا خصر نحيل ورا رمش كحيل
بقلمي/ خالد جمال ٧/٨/٢٠٢٥
ليست هناك تعليقات:
إرسال تعليق