ترجع تاني
قلبي يشوفك لو لثواني
المح طيفك جاي ف خيالي
اسرح فيك أو تيجي ف بالي
يالا يا خاين يالا يا جاني
انسى غرام كان بيني وبينك
حسك عينك
اوعى تقول لسه بتهواني
اوعى تقول البعد كواني
سهر الليل والشوق سوَّاني
أصل أنا شايفك واحد تاني
كدبك باين جوه ف عينك
حسك عينك
دانتا جنيت على قلبي وبعته
كان ف ايديك بسهولة ضيعته
قلبك قاللي بحب طاوعته
جيت على قلبي وياما لاوعته
اصله آمنلك وانت خدعته
أيوه مشيت والشوق ودعته
جاي دلوقتي بتسأل فينك
حسك عينك
عمري ماكنت أتصور يوم
إن العشرة عليك هتهون
إن عنيك ييجي يوم وتخون
بعد ما عشت أنا بيك مفتون
كنت الدنيا وكل الكون
دانتا ماخنتش قلب حنون
خنت الدم اللي ف شرايينك
حسك عينك
بقلمي/ خالد جمال ٢٠/٩/٢٠٢٥
ليست هناك تعليقات:
إرسال تعليق