بقلم/نشأت البسيوني
حين يتكلم الصمت ويكشف الحقيقة بنكتشف ان العمر ماشي بينا على سطرين سطر بنعيشه وسطر بنفهمه بعد ما يعدي بنعرف ان في لحظات كتير ما كانتش محتاجة صوت كانت محتاجة هدوء يشرح لنا اللي ما شفناهش ويعرفنا مين كان بيحب بصدق ومين كان بيمثل دور الحب ومين كان موجود علشان مصلحته مش علشان قيمتنا الصمت مش ضعف الصمت مرايه بتعكس نوايا الناس
من غير ما نتكلم الصمت حكم حل كل معادلة معقدة كنا فاكرينها محتاجة شهور تفكير الصمت بيرفع اللي يستاهل ويوقع اللي كان واقف على كتافنا من زمان وبيكشف علاقات كانت بتاكل من عمرنا واحنا فاكرينها أمان ومع كل مرة بنسكت فيها ونعقد هدنة مع نفسنا بنشوف المشهد كامل بنشوف الكلام اللي ما اتقالش والعيون اللي ما عرفتش تخبي غدرها والقلوب اللي ما كانتش علينا وبتعرف ان اللي
نحبه مش لازم يكون ليه مكان في حياتنا ولو كان مكانه في وجداننا كبير في زمن مليان ضوضاء بنكتشف ان اللي يسمع صمتك هو اللي يفهمك واللي يفهمك هو اللي يحافظ عليك واللي يحافظ عليك هو اللي يستاهل مكانه جنبك غير كده كل ده عبور مؤقت وكل قلب ما يعرفش يطبطب على خوفك ما ينفعش تدي له مفاتيح حياتك ومع كل خطوة قدام بنتعلم ان الناس مش درجات قرب
الناس درجات قصد الناس درجات نية الناس درجات أثر في ناس تعدي وتسيب جرح وفي ناس تعدي وتسيب نور وفي ناس تعدي كأنها ريح وفي ناس وجودها قمة الرحمة السنين بتكبرنا بس مش بالعمر بتكبرنا بالفقد بالخيانة بالدهشة بالخذلان بالأصحاب اللي كانوا عيلة وطلعوا محاولة بالضحك اللي اكتشفنا انه كان ستار وبالوعود اللي اتكسرت قبل ما نصدقها بالناس اللي افتكرناها ظهر
وطلعوا باب بيقفل من غير إنذار لكن رغم كل ده الصمت بيعلمنا إن الرزق مش ناس كتير الرزق ناس قليلة بس صافية الرزق قلب مرتاح مش قلب متعلق الرزق كلمة صدق مش صوت عالي الرزق ظهر ما بيتهزش مش كتاف بتسيبك أول ما تحتاج وبنرجع نفهم إن مفيش علاقة تخلينا أصغر من نفسنا ولا وجع يستاهل نسهر عليه ولا حد يستاهل ناخد من عمرنا علشانه وهو ما يعرفش أصلا قيمة
وجودنا وإن الرحيل مش خسارة الرحيل تحرير ومهما اتلخبطت الطرق بنرجع نلاقي نفسنا بنمشي من غير خوف من غير صوت من غير تردد وبنلاقي الصمت بيقول لنا اللي محدش قاله عمر الصمت ما كان هروب الصمت كان طريق وطول ما احنا ماشيين في السكة دي سكة النور اللي جوه السلام اللي على قدنا العلاقات اللي قد قلبنا مفيش حاجة تضيع ومفيش وجع يفضل ومفيش حد يضيعنا واحنا فاهمين قيمتنا
ليست هناك تعليقات:
إرسال تعليق