بقلم/نشأت البسيوني
حين يتكلم الطريق قبل أن نمشيه في لحظات معينه في عمر الانسان بيقف قدام طريق لسه ما مشيوش طريق شكله واسع لكن جواه أسرار كتيره وصوت خفي بيقول إن اللي جاي مش مجرد خطوه عاديه وإن الرحله ممكن تغير حاجات جوانا كنا فاكرينها ثابته من سنين يمكن الطريق مش دايمًا بيبان كله لكن فيه دايما جزء صغير من بدايته بيبقى كفيل إنه يشعل الفضول ويحرك القلب
ناحيته وكأنك مدعو لدخول تجربه مش زي أي تجربه الانسان دايما بيفتش عن حاجه تحسسه إنه لسه حي حاجه تهزه من جوه وتطلع منه اللي افتكر إنه اختفى حاجه تخليه يعرف إن عمره مهما جرى عليه تعب لسه قادر يعيش ويحب ويخسر ويتغير من جديد يمكن كل واحد فينا عدى عليه يوم حس فيه إن العالم اتقل وإن الكلام جواه اتحبس وإن الاسئله بقت أكتر من الاشارات اللي بتدل على
الطريق لكن الغريب إن اللحظه دي نفسها ساعات بتكون أول باب للنور أول محاوله صادقه إنك تبص لنفسك من غير خوف وتقول أنا هنا ولسه قادر أكمل الطريق اللي ما مشيناهوش قبل كده دايمًا بيدينا إحساس إن جواه حاجه مستنانا حاجه يمكن نصبر عليها وحاجه يمكن نهرب منها لكن الاكيد إنه بياخد مننا شجاعه شجاعه إنك تسيب اللي اتعودت عليه وتروح ناحيه اللي ما تعرفوش
شجاعه إنك تواجه جزء منك كنت سايبه منسي في آخر الرفوف جواه تراب السنين شجاعه إنك تسلم إنك انسان بتتوجع وبتغلط وبتقوم وبتصلح طريقك من أول وجديد من غير ما تستنى تصفيق أو فهم من حد أصعب حاجه مش إنك تمشي الطريق الجديد أصعب حاجه إنك تتخلى عن خوفك من الخطوه الاولى لأن أحيانا الخطوه دي نفسها بتكون كفايه إنها تغير شكل حياتك كلها كأنها جره هوا
بتنضف صدرك من الغبار أو قبضه بتتفك بعد سنين من الصمت أو صرخه جواك أخيرا طلعت بعد ما كنت فاكر إنك نسيت صوتك والعجيب إنك لما تبدأ تمشي تلاقي حاجات كتير ما كنتش ملاحظها تلاقي ملامحك بتتغير مع أول محاوله وأول هزيمه وأول انتصار تلاقي الدنيا بتفتح لك باب صغير لسه ما تعرفش هيوديك على فين بس بتحس إنك أخيرا ماشي في طريق على مقاسك طريق مش
معمول لأي حد طريقك انت لوحدك وفي الآخر هتكتشف إن الطريق ما كانش مستنيك عشان توصله الطريق كان مستنيك عشان تفهم نفسك أكتر عشان تشوف اللي جواك بوضوح عشان ترجع لحاجه فقدتها من زمان حاجه اسمها انت
ليست هناك تعليقات:
إرسال تعليق