بقلم/نشأت البسيوني
حين يسقط صوت الحقيقة في الزحمة نلاقي الدنيا ماشية بسرعتها اللي ما بترحمش حد والناس بتجري ورا بعضها من غير ما تبص وراها كأن كل واحد شايل على كتفه جبل مش لاقي وقت يفهم غيره والقصص اللي بتتولد في الشوارع بتكبر جوه الظل مش قدام الضوء قصص ما حدش بيسمعها لأنها مش بتتصور وما بتطلعش تريند لكنها بتفضل موجودة زي نبض مكتوم جوه قلب حد تعبان
يمكن يكون قاعد على رصيف بليل بيفكر ازاي فضل واقف رغم اللي حصله يمكن يكون حد اتظلم واتشال حقه بكلمة اتقالت غلط يمكن حد اتخان واتكسرت فيه حاجة عمرها ما هترجع زي ما كانت يمكن حد حب بزيادة واتكوى زيادة وساب حكايته مرمية في نص الطريق ما لقاهاش حد يجمعها الدنيا يا صاحبي ساعات بتحطنا في أماكن ما كناش نتخيل نقف فيها وتخلينا نسمع كلام ما يشبهناش
ونستحمل وجع ما نستحقوش ونعدي على ناس كانوا المفروض يبقوا سند ولقينا ظهرهم أول واحد اتقلب علينا لكن وسط كل ده كل واحد فينا بيبقى ماسك في نفسه بالعافية خايف يقع لو وقع محدش هيوقفه خايف يحكي لو حكى محدش هيصدقه خايف يصرخ لو صرخ محدش هيسمعه في زمن بقى الوشوش فيه متشابهة والقلوب مختلفة وزمن بقى فيه صوت الكذب أعلى من
صوت الحق وزمن اللي بيقع محدش بيلمه إلا لما تبقى حكايته مادة سخنة للناس اللي مش مهمة عندها غير تحكي مش تهتم وتنشر مش تفهم وتعلق مش تعطف وتحكم من غير ما تفكر دقيقة واحدة هو الراجل ده اتكسر ليه البنت دي تعبت ليه الحكاية بدأت منين وانتهت فين الحقيقة يا محترم إن اللي بيقع النهارده مش ضعيف واللي بيعيط مش قليل واللي اتظلم مش مغلوب ولا مهزوم ده بس
حد تعب من حمل كبير شايله لوحده حد استخبى وجع ورا ابتسامة حد حاول يفضل ثابت عشان ما ينهارش حد وقف قدام الدنيا كلها وقال انا موجود حتى لو محدش حاسس بيا ومهما الدنيا حاولت تخنق صوت الناس اللي اتظلمت وتغطي على حكاياتهم وتدفن الحقايق تحت كلام كتير ما فيهوش رحمة الحقيقة عمرها ما بتموت بتفضل عايشة وسط الوجع لحد ما تلاقي باب يفتح لها من مكان ما
حدش متوقعه وتخرج وتاخد حقها حتى لو بعد وقت طويل لأن الحق ما بيضيعش واللي اتكسر يتصلح واللي اتاخد يرجع واللي اتظلم ربنا شايفه وسامع صوته حتى لو الدنيا كلها طنشته
ولو الناس كلها ما سمعتش صوت الحقيقة يكفي إن ربنا يسمعه
ولو اتقفلت كل البيبان في وشك يكفي إن باب واحد عند ربنا مفتوح ولو اتسدت الطرق يكفي إن ربنا يفتح لك طريق ما خطرش
على بالك وقتها بس هتعرف إن الزحمة اللي خدت صوتك زمان
مش هتقدر تاخد حقك طول العمر
ليست هناك تعليقات:
إرسال تعليق