بقلم/نشأت البسيوني
في لحظة معينة من عمر الإنسان بيصحى كأنه قدام عالم جديد عالم ما بيشبهش اللي عاشه قبل كده ولا بيحمل نفس الملامح اللي كان متعود عليها يحس إنه واقف في نص الطريق لا راجع للي فات ولا عارف يوصل للي جاي بس جواه صوت صغير بيقول له إنه لازم يكمل حتى لو كان الطريق أوسع من وِحدته وأضيق من نفسه اللي بتتعب كل يوم شوية وتقيل عليه ذكريات ماتت من
زمان لكنه لسه شايلها فوق قلبه كأنها لسه بتتنفس ويمكن ده أصعب جزء في الحكاية إن الجراح القديمة ما بتختفيش لكنها بتتخفى تختبي ورا الضحكة ورا الشغل ورا الزحمة وتظهر فجأة وقت ما يكون الإنسان أضعف من إنه يداريها ومع كل ظهور جديد يفتكر إنه لسه محتاج يقوى أكتر يتماسك أكتر يواجه بدل ما يهرب يمشي بدل ما يقف في مكانه وفي اللحظة اللي يفتكر فيها
إن الدنيا قست عليه يكتشف إن قسوته على نفسه كانت أشد وإنه كان بيحارب معارك مش بتاعته ويصلح ناس مش بتتصلح ويعطي فرص كتير للي ما يستاهلوش ويوم ما يقرر يحمي نفسه يلاقي العالم كله مستغرب إزاي بقى قوي فجأة هما نسيوا إنه اتحمل فوق طاقته سنين ومع الوقت يبدأ يتغير ما بقاش يصدق الكلام السهل ولا الوعود اللي بتتقال بسرعة بقى يصدق السلوك
واللي يثبت واللي مايسيبش في نص الطريق بقى يشوف الناس على حقيقتها من غير ما يلبسهم جمال مش فيهم ومن غير ما يبني عليهم أمل مش موجود وبقى يعرف إن أقسى الخسارات مش فقد الناس لكن فقد نفسه وهو بيحاول يرضيهم وفي النص تتولد جواه قوة غريبة قوة مش من نوع الصراخ ولا التظاهر بالصلابة لكنها قوة هادية متعبة صافية قوة بتقول أنا مش هقع تاني
مهما حصل قوة بتخلي الخطوة اللي جاية أعمق من اللي فاتت والقرار اللي بيخده مايعرفش الندم والباب اللي بيقفله ما يتفتحش تاني مهما كان وفي آخر الطريق يفهم إن الرحلة كلها كانت ليه مش عليهم وإن الدروس اللي وجعته كانت هي اللي قوته وإن الأيام اللي خسر فيها ناس كانت هي الأيام اللي كسب فيها نفسه وإن الخطوات اللي مشيها بإصرار حتى وهو بيترنح هي اللي وصلت بيه
لنقطة كان فاكر إنها بعيدة جدا يرفع راسه ويتنفس بعمق ويمشي خطوة جديدة خطوة ما فيهاش رجوع ولا خوف ولا تردد خطوة كلها يقين إن اللي جاي عمره ما يكون أقل من اللي راح وإن القلب مهما اتكسر يعرف يتجمع من جديد لو صاحبه قرر يكمل
ليست هناك تعليقات:
إرسال تعليق