عشق حبيبي وعد مقدر
بحر مالوش لا قرار ولا حد
بعده عليا الله لا يقدر
طعنة بخنجر ماضي الحد
عدى بنات الريف والبندر
عمري ماشفت ف وصفه أنا حد
ريحته نسايم عود ولافندر
عطره يخلي الروح تتشد
وعدي عليه لما بيتغندر
لما يسوق في دلاله بجد
رمشه يا ناس بنج وبيخدر
لو يوم طل عليك واتمد
نظرة عينه دي نار بتودر
تقضي على الحرمان وتهد
أما الخال على خده منور
وسط جناين فل وورد
شعره سواد كما ليل بيستَّر
زي الموج له جذر ومد
قده يا ناس ملفوف ومدور
لما بيمشي تغازله الأرض
أما شفايفه بشوفها بفكر
لو يوم تسقي شفايفي الشهد
ماهي رياحين وعسلها مسكر
يوم ماقطفها ده يوم السعد
ياللي هواك ع القلب مسيطر
وملكتني من وأنا ف المهد
والشوق فوق جبهتي متسطر
وعلى كفوفي اتنقش الوعد
اوعى ف يوم على بالك يخطر
إني راح انسى الشوق والود
حبك جوه ف قلبي بيكبر
والشوق دفا روحي من البرد
بقلمي/ خالد جمال ٢٧/٣/٢٠٢٦
ليست هناك تعليقات:
إرسال تعليق