ياللي الكُره عمى عيونكم
ياللي الحقد ف شرايينكم
دانتم محال تتسموا رجال
وكيد قلوبكو أكيد لزوال
هيجف ينضب في معينكم
أعوذ بالله من كل حسود
من غل مالي قلوبكو السود
ده مهما كان ربنا موجود
قادر يهد ف روحكو وجود
ويبكِّي فيكو يحزنكم
أعوذ بالله من كل خسيس
ينقل كلام ملعون وخبيث
يجرح شعور يقتل أحاسيس
يكسر ف قلب بريء وحسيس
عايش ف خيركم ويشينكم
أعوذ بالله من كل وضيع
دايماً في سر الناس بيذيع
وبزيف كلام ع الخلق يشيع
خراب بيوت فراق مجاميع
وكأنه تار بينه وبينكم
أعوذ بالله من ناس هلاهيل
ماتصونش يوم معروف وجميل
الغدر فيهم طبع أصيل
واخدينه ورث وجيل ورا جيل
لو قدروا ياكلوا في مصارينكم
أعوذ بالله هوه الحامي
هوه اللي سامع لكلامي
هوه اللي حاسس بآلامي
يحفظنا من كيدكو الدامي
ويرده دايماً في قلوبكم
أعوذ بالله منكم
بقلمي/ خالد جمال ٦/٨/٢٠٢٦
ليست هناك تعليقات:
إرسال تعليق