ـــــــــــــــــــــــــــــــــــــــــــ
يَا مَامَا تِعِبْت بِجَدّ خَلاَص
مُش قَادْرَه أَعَدِّي اَنَا ظُلْم النَّاس
مُش قَادْرَه أَفُوْت تَانِي مِن حَقِّي
تِعِبْت كَلاَم وِتْعِبْت إِحْسَاس
وِيَا بِنْتِي اِسْتَهْدِي أَوَام بِاللاَّه
وِمَعَ الإِحْسَان خَلِّيْكِي مْعَاه
مَا يْهِمِّك أَبَداً ظُلْم النَّاس
لَو ضَاقِت قُوْلِي يَا بِنْتِي الله
وِيَا مَامَا الصَّبْر مَا بِإيْدَيَّا
الكُلّ فِي فَرْوِتِي كَل تَانِي
مِ الغِيْبَه النَّاس شِبْعِت فِيَّا
وِعْيُونْهُم حِقْد وِحَسْدَانِي
رَبِّنَا يِكْفِيْكِي كَلاَم مِنْهُم
وَهَيِدْفَع مِ الْحِقْد عُيُونْهُم
فِي الصَّبْر يَا بِنْتِي أَيْوَه الله نَجَاه
خَلِّيْهَا لِلَّه مِش عَلَشَانْهُم
بَحْكِي اللي فِي قَلْبِي عَلَى لْسَانِي
عُمْرِي مَا بَعْرَف أَلِفّ وَادُوْر
شَايْفِيْن صَرَاحْتِي فِي عُنْوَانِي
عَايْزِيْنِّي أَلِفّ مَعَاهُم أَدُوْر
خَلِّيْكِي مَاشْيَه عَلَى مَبَادْئِك
لَو كُلّ خَلْق اللاَّه غَيَّر
دَه انْتِي اللي عَالْيَه قَوِي بِصِدْقِك
عُمْر النِّفَاق جَدّ قُصَيَّر
بَوْعِد وِبَوْفِي أَنَا بِوَعْدِي
مَا لاَقْيَه حَدّ فِيْهُم وَفَّى
وِيَامَا اَسَامِح وِبَعَدِّي
سَمَاحِي وَاخْدِيْنُه بِخِفَّه
رَبِّي يِجَازِيْكِي الْخِيْر بِالْخِيْر
رَبِّي وِزَكَّى كِتِيْر نَفْسِّك
أَنْعَم عَلِيْكِي بِالتَّفْكِيْر
بِالْحِكْمَه رَبّ النَّاس خَصِّك
عَايْشَه يَا مَامَا وِبَرْضِي اللاَّه
حَافْظَه الْحُقُوْق حَتَّى الْجِيْرَه
بَرْضِي فِي قَرَايْبِي وِخَلْق اللاَّه
قَلْبِي الضَّعِيْف أَمْسَى فِي حِيْرَه
قَلْبِك دَهَب جَمِّلُه إِحْسَاس
رَبِّك وَهَب مِن دُوْن النَّاس
فِي الْجَنَّه رَاح يِسْعِد قَلْبِك
لِلْمُخْلِصِيْن الْجَنَّه خَلاَص
دَيْماً يَا دُنْيَا طَرِيقْنَا الْخِيْر
لَو حَتَّى كُلّ النَّاس أَشْرَار
هَنْرَاضِي رَبِّنَا رَبّ الْخِيْر
بِقْلُوْب رَقِيْقَه مَعَ الأَبْرَار
ـــــــــــــــــــــــــــــــــــــــــــ
كلمات الشاعر أحمد شاهين
------ مصر -- أسيوط ------
ليست هناك تعليقات:
إرسال تعليق