ايه جرالك كنا كلنا تحت جناحك
وكنتى مجمعانا كلنا صفووف
وبتلمينا من كل جانب ف جناحك
اللى كان بيحمينا من أى خوف
انتى نسيتى ولا ضاع مفتاحك
وبقيتى ذينا نايمه ع الرصيف
بنيتى بيتك من عضم كتافك
طوبه طوبه ف الشتا والصيف
وسقيتى طينك بعرق مجدافك
ورفعتى الميه بقلب الشادوف
وداريتى جمالك تحت شالك
خايفه لحد يعرف ايه جرالك
او يقرب منك ويقوولك مالك
وعمرك فيوم مكان وشك مكشوف
ايه جرالك إنطقى بلاش بقا سكوت
اتكلمى وقولى وإعلنى كل المكتوم
لأمتى ح تتحملى وتخرسى الصوت
ومرارة الكتمان فى الصحيان والنوم
فضفضى بإللى فيكى وإقهرى الخوف
لحسن تموتى وتتحملى ذنب السكوت
قولى الحقيقة وخلى ضميرك مرتاح
إعلنيها بلسانك بكُل الُلغات والحروف
مهما طالت عتمة الليل آخرته صباح
والحقيقة عايشه وعمرها ما تمووت
د/ حسن الشوان / مصر
ليست هناك تعليقات:
إرسال تعليق