د/علوي القاضي . ـ . إستشاري القلب
.★|★. لو قلبك نطق وتكلم كان قال لك إيه ؟! ،،، كان قال لك : «(أنا قلبك يعني حياتك)» وإستطرد ،،،، ولذلك من الضروري أن تعرف أهم أسباب ضعف عضلتي ، عشان تحميني وتحمي نفسك :
.★. إنسداد أو تضيق شراييني التاجية لأنه يقلل وصول الدم لعضلتي
.★. الجلطة لأنها بتمنع الدم عن جزء من عضلتي وتضعفها
.★. إرتفاع ضغط الدم بيجهدني لفترات طويلة لحد ما أضعف
.★. أمراض صماماتي سواء بتفتح أو تقفل غير طبيعي تتعبني
.★. التهابات العضلة بسبب فيروسات أو أمراض مناعية تضعفني
.★. إضطراب ضرباتي سواء بالسرعة أو البطء المفرط بيأثروا على كفاءتي
.★. التدخين بيؤدي إلى ضعف شديد في عضلتي ، وأنصحك ، لو ظهر أي أعراض أو شكوى مني ، ماتتأخرش عن إهتمامك بفحصي عند متخصص ، لأن صحتي وصحتك تستاهل
.★|★. وبعدين يا صاحبي إنت مش ناوي توقف التدخين المستمر كل يوم
.★|★. ماهو مش معقول أبقى بضخ دم كل يوم ، وفجأة ألاقي نفسي دخلت في خناقة مع مواد كيميائية سامة زي أول أكسيد الكربون ونيكوتين ، ومطلوب مني أشتغل بجهد أكبر ، بسبب التدخين اللي إنت مش قادر تبطله
.★|★. تعالى يا صاحبي أوريك نبذة بسيطة عن اللي بيحصل فيا لحظة ما تبدأ في التدخين (:) أول دقايق بعد السيجارة معدل ضرباتي بيزيد ، ضغط الدم بيرتفع شوية ، الأكسجين في الدم بيقل ، (:) خلال ١٠ - ٣٠ دقيقة ، بيطلب مني أعمل مجهود أكبر ، لأن الشرايين بتضيق ، وكفاءة الدم بتقل في نقل الأكسجين والأنسجة تبدأ تحس بالمجهود ، (:) على مدار اليوم نفسه لو التدخين متكرر ، هيحصل تغيرات أكبر في وظيفة الأوعية ، يبدأ تصلب أو تلف خلوي بسيط ممكن يتراكم على مدار الأيام
.★|★. يا صاحبي لا تقولي أنا بدخن من زمان ومحصليش حاجة وزي الفل أهو ، أكيد لأنه مش بالضرورة تشوف التأثير دلوقتي ، ويمكن علشان إنت لسه صغير وصحتك مساعداك ، فمش شايف أثر عاداتك السيئة دلوقتي ، لكن عمرك فكرت (إيه اللي ممكن يحصل بعد عشر سنين مثلًا ، لو موقفتش التدخين النهارده ؟!
.★|★. الخلاصة يا صاحبي ، إن اللي بتبدأ بيه النهاردا هيتراكم ويظهر أثاره قدام ، جرب توقف تدخين دلوقتي علشان صحتي وصحتك تكون أفضل قدام
.★|★. يا صاحبي دخن براحتك ، زي ما تحب ! ، لكن خليني أقولك حاجة مهمة جدًا ، إن التدخين مش مجرد عادة أو وقت فاضي ، ده قرار ممكن يغير حياتك بشكل كامل ، وليس بالضرورة للأفضل ، لو كنت مفكر إن السجاير بتريحك أو تخليك مركز ، لازم تعرف إنها بتضرني أنا وشراييني التاجية ، وأنت ورئتك وجسمك كله
.★|★. يا صاحبي ، لازم تعرف إن التدخين بيسبب (:) إمراضي أنا وشراييني ، لانه بيزيد ضغط الدم ، ويخلي الشرايين تتصلب ، وده بيخلي إحتمالية الإصابة بالنوبات القلبية والسكتات الدماغية أكبر بكتير (:) كمان بيسبب مشاكل في التنفس ويضر الرئة بشكل مباشر ، ويسبب مشاكل مزمنة زي الربو ، والتهاب الشعب الهوائية ، والإنسداد الرئوي المزمن ، وأخطر حاجة ، سرطان الرئة ، وكمان بيسبب (:) ضعف المناعة والجسم بيبقى أقل قدرة على مقاومة الأمراض ، ووقت الشفاء بيطول ، كمان بيسبب (:) مشاكل صحية تانية زي ضعف القدرة الجنسية ، وتسريع ظهور التجاعيد ، ومشاكل في اللثة والأسنان ، وأمراض مزمنة كتيرة
.★|★. وفي الآخر يا صاحبي ، مهما قلت (أنا بس بجرب) أو (أنا مش هتأثر) ، الحقيقة إن الضرر ممكن يبدأ صغير ويزيد مع الوقت
.★|★. فلو عايز تدخن تذكر كل حاجة قلتها لك عن أضرار التدخين ، وحاول تفكر فيا وفي صحتك قبل كل حاجة ، القرار في إيدك ، وقلبك وصحتك أمانة
.★|★. يا صاحبي ؛ التدخين مش بس بيضر الرئة ، التدخين عدو مباشر ليا وشراييني ولأجهزتك ، حتى لو التدخين خَفيف ، له نفس الضرر
.★|★. أحب أقوللك يا صاحبي ، إن أنا وشراييني التاجية من أكتر الأعضاء اللي بتتحسن بعد الإقلاع عن التدخين ، وبالتالي الضغط يتحسن ، والدورة الدموية ، وخطر الجلطات يقل
... تحياتي ...
ليست هناك تعليقات:
إرسال تعليق