ياللي انت عشت بتخدعني
وهواك هجرني وودعني
ده بكره تندم يا بايعني
على قلب عاش ف هواك مغلوب
ياللي انت قلبك لوعني
وبنار غرامك لسوعني
وتقوللي عادي وايه يعني
ده نصيب ووعد عليك مكتوب
كان ذنبي ايه تجرح قلبي
دانا ياما اخلصت ف حبي
وسقيتك الشوق من نبعي
وصبرت صبر معاك ايوب
ياللي انت عشت ف شراييني
وسكنت في القلب وتيني
انا قد جرحي اللي كاويني
ما هو أي جرح بكَيّه يطيب
قلبي اللي حبك عودته
ينساك وليك انا سودته
عن نهج حبك حودته
وخلاص عن الأشواق هيتوب
بكره اللي جاي شموع ليا
أما انت هتآسي أسية
تتمنى يوم ترجع ليا
وتشوف ف بعدي جراح وهموم
عمر الندم ما يرجَّع لك
قلبي اللي عاش ليك وخضعلك
ولا أي دمع هيشفعلك
ياللي انت عشقك كان لي غيوم
بقلمي/ خالد جمال ٤/٨/٢٠٢٦
ليست هناك تعليقات:
إرسال تعليق