جرَّعني المر سقاني الويل
مزّجني وزبط التحويجة
وشحنلي الباقة نواح وعويل
جددتها بييجي مليون ميجا
شاع فيا وقال على قلبي كتير
وعملي دعاية وترويجة
شوقي كان وياه دوغري مالوش ميل
شوقه كان زجزاج فيه وتعويجة
صنت معاه وعدي ف نن العين
ولعب بالهوى حجلة وسيجا
اتولد العشق في روحي جنين
من بعد عُطال جه تفريجة
من قبل معاده يا ناس بسنين
شاف رمشه النور زي خديجة
صار ليا اقرب من ضي العين
كان سكني وكان عندي وليجة
خان قلبي وعقلي محاه في يومين
م الصدمة مهنج تهنيجة
كان ذنبي إني أنا أخلصت سنين
فطبيعي يكون غدري نتيجة
بس معاه بكره هرد الدين
واسقيه من نفس التحويجة
بقلمي/ خالد جمال ١٥/٨/٢٠٢٦
ليست هناك تعليقات:
إرسال تعليق