داحنا في زمن دوّار
غدّار وبيحيّر
بين العذاب والنار
بيقولك اتخيّر
فيه البشر أطوار
ميت لون بتتغير
أيام ما فيها أمان
لكبير ولا صغير
ده لو وقعت مش هايشيلوك
اصحى يا صاحبي ليغفلوك
أيام وفيها الغش
موجود بميت حالة
مش عاوز يشوفلك وش
ويقولك تعالى
مصلحته ويا القرش
في النية متشالة
عايشين ملوك والعرش
من خسة وندالة
بيسدوا نِفسك وبيقفلوك
اصحى يا صاحبي ليغفلوك
يخش بيتك ويصاحبك
وعنيه تبص لاُدام
وكل غرضه إنه يطيحبك
عشان علاقة مع المدام
يفضل وراها بأسلحته
يخلق ما بينكم الاحتدام
شوية روحي وانا بحبك
وشوية زن على الودان
خلاك قتلت عشان شرفك
بسهولة دخلك اللومان
دول خربوا بيتك وضيعوك
اصحى يا صاحبي ليغفلوك
بقلمي/ خالد جمال ٢٦/٨/٢٠٢٦
ليست هناك تعليقات:
إرسال تعليق