إيه ظروفك
-----------
آه يا قلبك لمّا غبتي عنّي.. جمعه ويا سبت
حاسس إنك بعدتي ولا اتصلتي ولا انا اتصلت
ليه قساوتك ياحبيبتي عمري عنك.. ما انشغلت
مين معاكي جاب في سيرتي أصلي يومها كتير شرقت
.
قلتي إنك حبتيني فين دليل الحب عَندِك ؟
بوسه حلوه فوق جبيني ليه ماشفتش إلا عِندِك
نفسي اعوض يوم سنيني وأقضي باقي العمر جنبك
من جمالك أملى عيني ياللّي عيني نورها منك
فين حلاوتك دوقيني دا الهوى والعشق منك
.
قلت "جمعه وسبت" ماشي بكره ييجي "الحد" اشوفك
برضو طيفك ليه ما جاشي نفسي أعرف إيه ظروفك
إيه اللي عنّي ـ ياحبي ـ حاشك زاد حنينك ولا خوفك
دي العيون في البرد شاشك والرموش في الحر روفك
قلبي من ساعة ما شافك ـ يوم ـ مادقّش غير حروفك
.
وادي "الإتنين" جه وقلنا ييجي روح القلب يسأل
والفرح يرجع يزورنا بس هو أتاريه بيتقل
والموبايل جنبي ساكن ما في يستقبل ويرسل
من يومين ومافهش شاحن نفسه يعرف إيه بيحصل
والحقيقه شمس غايبه بين أمالي وبين غيومك
ياحبيبي أنا روحي دايبه بس مش قادر ألومك
أصل تقلك حاجة خايبة ليه تشمّت فيك خصومك
م الحياة أنا راسي شايبه سيبني أشيل عنّك همومك
.
جه "التلات" والشمس طلعت لما روح القلب فيفي
نورها غطى ع المحطه والربيع خضّر خريفي
روحي ردت فيا تاني والحياة رجعت جميلة
ياحبيبتي أنا مش أناني في الهوى أنا مالي حيله
القمر بقى له وسيله يطلعوا له في يوم وليله
وإنتِ حبك يا حياتي مش لاقي له وسيله
.
لّما جه "الأربع " وشفتك العوازل قاعدة جنبك
ياحبيبتي أنا قلبي حبّك مش صحابك أو قرايبك
حاسّه إنك حبتيني ولا يعني بحبي غاصبك
إنتِ غاويه تحِرميني من حنانك ...... آه يا قلبك
قلبك إنتِ ليّا بيتي إن رفضتي أو رضيتي
ولا يعني عشان عشقتك بعتي فيّا وإشتريتي
دا الهوى ما مفهوش مذّلة إبتديت ولا إبتديتي
مين اللي قال للحب مٍلّةْ فين سمعتي وفين قريتي
.
"والخميس" أهو جه وغبتي الحياة ضلمة في عنيّا
إيه حكايتك يا حبيبتي سايقة تقلك ليه عليّا
إهدي حبّه وفهميني هاتي إيدك بين إيديه
دا اللي بين قلبك وبيني حاجه غير الخلق ديّه
قلبي ليكي أحلى جَنّهْ وإنتِ قلبك حِتّه مِنّي
إبعدي عُزالنا عنّا إوعى تاني تغيبي عني
::
(روفك ) بمعنى :اي مكان للهواء النقي
//
بقلم : علي أحمد أبورفيع
ليست هناك تعليقات:
إرسال تعليق