مشاكـــــــــــس
تحياتي محمد ياسين
مشاكس معاكس وحلمك باعوه مناهد معاند وقلبك داسوه
في وسط الديابة أكيد راح تتوه
ومين للغلابة يا بكره اللي جاي
وقفت وهتفت وصرخت وناديت
تعبت وآخرها ندمت ويا ريت
من الوهم فقت وآمنت ونسيت
عشان في النهاية أكون شبه حي
مشيت في الشوارع دخلت الجوامع كسرت الموانع وشفت البيوت
لاقيت كله ماشي بهايم مواشي ومش فارقة واحد يعيش أو يموت
وآخر المتمة في هيصة ولمة هاجيلك وقلبي معايا ف تابوت
ما عدتش بادور ولا احلم بضي
عشقتك في مرة يا حلوة ومرة
غرقت ف بحورك وعمرك في مرة
ما بليتي ريقي بشوقك يا حرة
وسايبة الألم في الضلوع ماله زي
قالوا لنا القضية وفين القضية
ما سيبنا القضية وصاحبها ونسينا
وتهنا ف دروبها وهيا ونصيبها
في سكة عذابها سرحنا ومشينا
في زحمة جروحنا بنسلخ في روحنا وصوت القضية بشوق بينادينا
لا يمكن ها نبعد وننسى القضية
عافرت وقاومت ووقفت بشرف
لأن الحقيقة جابت لي القرف
ولاجل الحقيقة قلوبنا البريئة
في كل الحقايق بتبقى الضحية
بنتعب ونشقى عشان بكرة نلقى
حقيقة حياتنا اللي ضايعة في فرقة
ولا هيا فارقة هانلقى ما نلقى
ولا فارقة تدبل ورودي ف إديا
عشان خاطري يام المواجع تحني
ماهو انتي اللي عمري ما خاب فيكي ظني
حرام بعد شوقي وحنيني اللي جابني أشوفك بتقسي عليا وتجني
والاقي المواجع بتنده عليا
با شوفك مرايتي وعمرك ما كنتي وعمرك ما تبقي مرادي وغايتي
ولو كات معاكي وبإ يدك نهايتي
ما ها ضعف قصادك ولا نسى القسية
ها لوشك و احوشك بعيد عن طريقي
يا سايبة وحوشك تنشف في ريقي
يا ناصبة المدافع وبرضه ما نافع
وطبعك تزيدي الهوان والأذية
يا سكة مهالك وحسنك دا هالك خلعتك رميتك ومالي ومالك
ها سيبلك حرامك يغرق حلالك
وها نسى اللي بينا وها بعد شوية
باقولها في وشك جريئة وصريحة
يا أس المصايب يا وحشة وقبيحة
بذنب الغلابة اللي ماتوا ف غرامك
إلهي يا شيخة تجيلك فضيحة
واشوفك ما تسوي ولا ليكي دية
سؤالي يا داير في قلب الحكاية
خلاص النهاردة ها حط النهاية
لظلمك يا قاسية وعنادك معايا
ما هو انتي الحكاية وكمان القضية
وعمرك ما تبقي في يوم الضحية
حقوقنا اللي راحت أكيد بكره جاية
ومين اللي قال ان بعنا القضية
ما هو انتي الحكاية وأصل القضية
ليست هناك تعليقات:
إرسال تعليق