(( كداب كبير )) تخاريف
بقلمي / عصام حسيني مدين
............
كداب كبير لما قولت
تحب أمك حب أكبر م الخيال
حب بيزلزل كيانك والجبال
وهو واجب بس بتقضيه يا خال
الصراحة هي شالت فيك جنين
بعد منها الطلق جابك للحياة
من آهات الطلق فيها جيت حزين
من ألمها كان مصيرك منتهاه
رضعت فمك لبنها
سهرت الأيام عشانك مش عشانها
أو عشانها
مش مهم المهم
كبرت حبة وهي
مالت حبتين
حبت الواد الصغير
بعد منك
وانت فوق الرف متلفلف كمنك
قال كبرت وعدى سنك
ع الدلع وعلى الدلال
انت شايب م الطفولة
فيك كهولة فانسى سنك
واندفن بدري بسهولة
عنكبوت القسوة بيشد الحبال
فوق رقابك
قلبها نسيك وسابك
واللي منها ياعيني نابك
ضمتين
وقول لترين تلاتة من حليب
صدرها صدك في تاسع شهر سيب
وابقى كملها ببليلة ولا ريري
يا صغيري
ياصغيري كبرت والشيبة ارتحال
كان أخوك الحيلة ع الحجر ونسوك
بس ابوك كان حنين فين ابوك ؟
حبك الكداب لأمك كان خيال
وهو واجب بس بتقضيه يا خال
...............
بقلمي / عصام حسيني مدين
الاثنين الموافق ٢٤ / ٥ / ٢٠٢١م
ليست هناك تعليقات:
إرسال تعليق