حصيرة قلبي
هافرد لقلبي حصيرة م الأحلام
دي يدوب على قد ماصحى ونام
وافرد ضلوع القلب ع الأوهام
واتلف قبل ما يتسرق مني الحنين
ما بين أربع حيطان رمياني في التوهة
في الحيرة والنسيان وحواري مشبوهة
أفضل يدوب إنسان وعنيا غموها
ويدوب أعيش من غير ماحس انا مين
نغمة كآبة الصوت في الحلق بتمرر
فرق الحياة من الموت مين اللي بيقرر
والدفنة جوا تابوت مشهد بيتكرر
حكايات تشيب بلد علامات تبكي العين
هاعمل لقلبي حصيرة على قده
يمكن دموع العين بالحلم يتهدوا
أحلامنا ليه أيام بالعافية بيعدوا
والكتف شال قبل السنين بسنين
قبل المعاد بشوية هاستنى
وافرش لبكره الجاي ضحكة حب واتحنى
واركب بساط ريحك وأطير على الجنة
وانسى الوجع ولا باتش ليلة حزين
هافتح ميدان للشوق وف قلبك انتي براح
وافضل أبص لفوق وانسى اللي عدا وراح
يام الأدب والزوق أنا قلبي كله جراح
واخده العشم والحب رايحة بيه على فين
ياللي الجمال والزوق والرقة من طبعك
انا نفسي مرة ارتوي واشرب عسل نبعك
انا اللي بين الأسود أحميكي وانا سبعك
وافرش طريقك نغم من قلب كله حنين
يا ملهمة يا مغرمة بالفن والحواديت
حواريكي حب ودفا والقلب ليه فتافيت
انا دخت ياما كتير وكمان كتير لفيت
وسمعت ضحكك بكا من لهفة ويا أنين
فكي الحصار عني لاجل اللي بينا يعيش
الصبر فاض مني وآخرها لقمة عيش
بس ان خلف ظني في الكدب أصلي ماليش
أخطف حصان أبيض واعمل كما المجانين
هاعمل لقلبي حصيرة من قلبك
وافرش لحبي ملاية من حبك
لملمت دربي وهامشي على دربك
وانا تحت أمرك يا ست الحسن والحلوين
تحياتي
محمد ياسين
ليست هناك تعليقات:
إرسال تعليق