خسارة فيه دمعة عنيكِ
شعر غنائي بقلم/رحاب السيد.
بقولك اي.. متزعليش
ودموع عنيكِ متنزليش
شيلتى وسهرتى وكتير تعبتى
قاسى وأنانى محسكيش
بقولك اى.. متزعليش
بكره هييجى ويبوس إيديكِ
وهيبكى ياما كتير عليكِ
ماهو اللي شافو بعدك ياغاليه
دا كتير عليه ميتحكيش
بقولك اى..متزعليش
حزن وقسيه متبينيش
دا بكره يندم علي حب خانه
على عمر عدى على قلب صانه
ضحى وشال كتير مكانه
لا هيلقى عمره زيه فى زمانه
بقولك اى..متدمعيش
خساره فيه دمعة عنيكِ
عمره ما فكر ولا لحظه فيكِ
جرحك وألمك حطم في أملك
ولسه جاى يكدب عليكِ
بقولك اى..متصدقيش
هيقول بحبك خليني جنبك
مقدرش اعيش من غير عنيكِ
راجع يا غاليه يترجى فيكِ
اوعي في يوم يصعب عليكِ
إنسى اللى كان وانسيه كمان
وعيشى عمرك بعده فى أمان
ومتزعليش علي اللى فات
ومتندميش علي اللى كان
بكره هييجي ويبوس ايديكِ
وهيبكى يا ما كتير عليكِ
بقولك اى.. متزعليش
بقلم الشاعرة/رحاب السيد عطر اللافاندار.
ليست هناك تعليقات:
إرسال تعليق