وبقيت جماد
(الشاعر رضا البوشي )
الليل تقيله خطوته
و سايق في العناد
ونا فوق الموج بعافر
برتعش جوه َالرماد
قلبي حدفه الموج بعيد
على مركبه مافيهاش بلاد
طقت رجولي اتخشبت
وبقيت جماد
مع اني جوايا الف روح وكل روح
متقطعه متشعلقه في حبل الجروح
حتى سكينه الحياه
كل يوم تقطع وريد من غير معاد
وبقيت جماد
غريب بينده بعلو صوته ع الحياه
وما فيش احلام تقدر تعيش ف الضلمه
ولا مركبه جواها قارب نجاه
وبقيت جماد
اربع حيطان مقطف زلط
كراسه بيضا كل حروفها غلط
عجوز حزين
والضحكه على شفته قزاز
تمثال صنم
ماشي بيرقص علي عكاز
حبه حجاره
مرميه في قلب الشارع
لحظه سكون
واقفه في طابور الحياه
اربع صوابع.
متحنطين من غير دراع
وبقيت جماد
مجرد عدد
او حتى صفر على الشمال
كراكيب ورق
حبل اتحرق
مدفون في بير
اراجوز
ولا ميت ألم كان يهزمه
أسد فيل تخين تخن الجبال
وبقيت جماد
قلم جاف حبره جف وانتهى
نفسه يرجع يكتب تاني كلمتين
شويه حروف من غير نقط
كل البشر جواها محشورين
محلي الحياه في هيئه نبات او جماد
حتى الجماد له قلب
بيحس بالشقايين المطحونين
وبقيت جماد
ليست هناك تعليقات:
إرسال تعليق