فوق الجاكته
الشاعر (رضا البوشي)
فوق الجاكته كانت بواقي عطرها
مشيت وفاتت ع الطريق سحرها
شميت ريحتها فوق الجاكته
والنار تشعلل جوه قلبي
وف الاماكن كلها
حتى الطريق قبليا
كان مشتاق لها
روحت بيتي ورجليا مش شايلاني
مخلوق جديد جوه المرايا
اهو جاني
وريحتها خرابيش على جتتي محاوطاني
وتغيرت في عنيه حتى شكل النجوم
وكل الحاجات حواليه
احلوت في يوم
شيلت الجاكته جوه الدولاب
وكتبت عليها بدمعتي أغلى الاحباب
وكل ما ياخدني الاشتياق ويدوبني الغياب
ارجع احن لعطرها وافتح تاني الدولاب
واروح تاني للمكان
اللي مشيت خطاويها تاني عليه
واحن لذكرى راحت وفاحت عطرها في لياليه
وأرجع طفل صغير لحضن امه يحن
وردايه قبل ما ييجي الربيع تصرخ تئن
ياهلتري لو مريت صدفه تاني
ع الطريق راح اشم تاني عطرها ؟
كل الاشواق والعشق والمجروحين
عارفين اني بحبها
خايف لأحسن يوم العطر ينتهي ويروح
وياخد وياه فرحتي ولهفتي
وياخد معاه الروح
يا قلبي خدني جمال عطرها
شالني النسيم وطار
ما عرفت انا شكلها ورسمها
وفاتتني في التوهه والاختيار
اهواها ولا انساها
وانسي العطر اللي كان فوق الجاكته
فوق الجاكته
ليست هناك تعليقات:
إرسال تعليق