الشاعر / رضا البوشي
(ريان)
نزلت دموعي ع الورق تصرخ
ونا بكتب حروفك
مسكت دموعي في دمعتك
كان نفسها تحضنك مره تبوسك
يا ألف اه لما الورود
تتسرق منها الحياة
وتختفي حتى المشاعر
نصبح نلاقي نفسنا جوة المرايا
حبه وشوش متزوقة
ريان من كل قلبي باشكرك
رجعتنا تاني لجنس البشر
كل الصوابع جمب بعض
رجعها خوفك
رجعتنا تاني نئن نعشق نحن
ويا عم الأمير
ياللي نايم في القصر الكبير
ريان كان نفسه يلعب في التراب
وينام على سرير خشب
بملايه صوف مش حرير
كان حلمة زي حلمنا ابيض وقد السمسمه
احلامنا زي خيوط العنكبوت
مقصوص جناحها ممنوعة حتى تطير
ريان عشان ضعيف ورقة خريف
تدبل جدورها وتنكسر
وتموت في بير
مات ريان وماتت جوه ضمايرنا الطفولة
لا بقينا قوة عظمى ولا حتى ورده خجولة
دورت ع الأحلام وركبت موج البحر
اتاري كل البيبان سكتها مقفولة
ليست هناك تعليقات:
إرسال تعليق