نقطة ومن أول السطر بقلم بسمة سماح

نقطة ومن أول السطر

بيقابلنا ناس كتير فى حياتنا بنحبهم ونودهم ونخاف على مشاعرهم وودهم، ونفضل مستحملين قلة تقديرهم وكلامهم الصعب اللى بيطلع دايماً بضحكة خبيثة كأنه هزار

 لكن بيكون حقيقى والقلب عشان صافى بيقدر يقرأ اللى بين السطور، كام مرة حد نيمك زعلان بكلمة بايخة أو تصرف ماكنتش تتوقعه، كام مرة سامحت وقلت أكيد مايقصدش، لكن ياعزيزى لازم تفوق مش كل الناس صافية وبقلوب بيضا

 فيه ناس بتستكتر عليك حتى ضحكتك، لأن ماشافوش غيرها عشان ِتهَون عليهم وتطبطب على جرحهم، مع إن إنت من جواك محتاج اللى يطبطب على قلبك من كتر مشاكلك وهمومك اللى بتداريها، وتقول أنا أستحمل، ليه طول الوقت بتسامح فى حقك من ناس ماتستاهلش تكون فى قاموس حياتك أصلاً، عشان الحياة تمشى 

فعلاً هى هاتمشى بس بعد ماتسحب روحك بالبطئ، تخليك طول الوقت حاسس إنك جانى وإنت المجنى عليه، هاتمشى بعد مالحظات عمرك الحلوة تتسرق وإنت مش واخد بالك، عشان لازم تستحمل

لكن الحل نقطة ومن أول السطر، مع أى حد يزعلك، يقلل منك، يستكتر عليك اللى فى إيدك، يشتهى دنيتك مع إن حياته أفضل، لكن دايماً باصص لنص الكوباية الفاضى 

نقطة ومن أول السطر وإبدأ حياتك من غيرهم، تجاهل اعتبرهم طيف غير مرئى واعمل اللى يرضيك طالما فى طاعة الله، اعمل اللى يسعدك ويخليه قدام نفسك قوى متماسك، قادر على حل المشكلات، قادر على العيشة من غير قلنا وقالوا

ساعتها هاتحس إن العمر قصير وضيعت منه كتير أوى، فالْحَق الباقى وما تضيعوش. 

بقلمى: بسمة سماح