( وكان نِفسِي )
بقلمي / عصام حسيني مدين
,,,,,,,,,,,,,,,,,,,,,,,,,,
وكان نفسي ونفسي كتير
أكون شاعر كما المجنون
أكون نسمة بقلب حرير
أكون مركب يشيل حبيبين
يوصلهم لبر أمان
أكون فنان ولوحاتي تقول حاجة
أكون لقمة في إيد إنسان
بيتلهف يدوق حاجة
و أكون شمس الأمل للناس
و أكون عالم وأكون حساس
و أكون وردة عبير للناس
و أكون كلمة طهارة وحق
و أكون لحن الهوي الباقي
وكان نفسي أعالج كل أخطائي
و أكون زاهد من الزهاد
و واد حَبِيب بقلب جسور
وكان نفسي أكون النور
و أكون الليل لناس شقيانة بتعاني
ونِفسها إنها ترتاح علي مخدة
أكون لوحة بتسحر كل ألواني
وقصة من تاريخ عدي
أنا نفسي أكون بُكرة و أكون بعدُه
ومستقبل كبير واعد ومين أدُه ؟
و قلب كبير يساع الكل
وصابر مهما شاف من ذُل
وكان نفسي أكون دكتور لكن ببلاش
أعالج وجع ناسي ومستناش
و أكون فلاح من زمان ولي
بيروي زرعتُه بالحُب تكون غلة
و أكون ايد الحنان تمسح دموع بتسيل
علي خد الجراح وأرسم غنا ومواويل
و أكون لبس العيال في العيد
و مصروفهم و كراسة في وسط الإيد
و حلم عريس لبنوتة جمالها حزين
و فارس بالحصان الأبيض يخدها وراه
ويملا بالحنان روحها مع العاشقين
يدَوَقَها السعادة بِجَد
تشوف أحلي الليالي معاه
و كان نفسي أكون أحلي الوجوه في الخير
و كان نفسي أطير واسرح مع العصافير
وبتوكل علي الخلاق ما هي أرزاق
و أكون المجد للأوطان
أعليها وأعليها وتعلا كمان
وكان نفسي أكون إنسان لكين إنسان
لكن في القلب مش قلبي
يكون قلبي كقلب ملاك
مفيش قسوة ولا غيرة ولا أضغان
ولا جوا السواد عايش كأنه هلاك
أنا اللي كتبت كان نفسي عشان نفسي
أكون نَفسي بشكل جديد
مفيش جوايا غير واحة وقلب وليد
طهارة كما مريم وحزم كما الخطاب
وعفة كما يوسف وصبر كما يعقوب
أنا نفسي أكون مكتوب كما النقش القديم ع الحيط
أكون ذكري لكل الناس ما فيها عيوب
أكون زارع وأكون جاني
وأكون صانع وأكون باني
و أرمي الكلمة لوداني فتسمعني
و أكون وزان لأوزاني بدون تطفيف
أكون تاجر ضميره نضيف
و أكون ساعي البريد للخير
و أكون لمسة حنان بتطير
علي العايشين في أحزانهم
أكون في الأزمة خَدامهم
و أكون للحب أحلي سفير
وكان نفسي ونفسي كتير
,,,,,,,,,,,,,,,,,,,,,,,,,,,,,,,,,,
بقلمي عصام حسيني مدين
مصر المحروسة
ليست هناك تعليقات:
إرسال تعليق