ومن تاني
رجعت لنفسي من تاني
ومن تاني
حلمت بأحلى أيامي
رجعت لفرحة ف زماني
لبيت مليان بكل معاني شوق وحنان
لصوت الضحكة من قلبي
لحضن أخويا ولأختي
لصورة متعلقة في حيطة
وجوه الصورة كان جدي
صحيت الصبح من بدري
وماسك في إيدي كوراستي
معايا ساندوتش الفول
وبأجري على مدرستي
وواقف في الطابور مفتول
بغني غنوة عن بلدي
ولما رجعت من تاني
لحضن أمي الهوى نداني
وقعدة صالة ع الهادي
بنلعب لعب مش عادي
وأبويا جاني بينادى
بصوته الفرح كان آتي
تعالوا في حضني يا ولادي
حبيبي وعمرنا الماضي
أخدني الشوق لأيامي
وعدى العمر قدامي
وأبويا خلاص بقى ماضي
وراحت مني أحلى أيام
فلحظة تعدي بزماني
كبرنا وتوهنا فى الدنيا
بعدنا كتييير عن الماضي
وجينا نسيبه مش راضي
كتبنا في قصة من تاني
ومن تاني
شاذلي محمد عبدالرحمن حسين
ليست هناك تعليقات:
إرسال تعليق