الشاعر / رضا البوشي
المسحراتي ( الأسامي)
وحد الدايم اصحى يانايم
مسحراتى منقراتي
داير على الابواب
بصحى اهلى وجيراني
خلاني والاصحاب
ويا عمي شكرى
اسمع نصيحتي
ولم نفسك من ع القهاوي
والبنت باتعه
فى الحق جدعة
واخوها ياسر بتاع بلاوي
على طبلة واحدة
وللساعه واحدة
بقول يارب الدنيا تحلى
كل القلوب تكون كده
يد واحدة
فى كل حتة انا بنادي
يا عم نادى بقول ياهادي
وبلدنا تبقى كده فى العالي
وياعم فتحى انت وياسين
رمضان كريم على المسلمين
وقلوبنا صافية بالحب دافية
نايمين كده ومطمنين
إصحي ياطه قبل السحور
الفجر قرب والدنيا نور
والعم بدرى صاحيلى وخري
ما هو لسه ساكن فى عاشر دور
اصحي يا نايم وحد الرزاق
والبنت فرحة صاحية النهاردة
خدودها حمرا زي الفراولة
والبنت ايه حافظة الحكاية
وتقول وتحكي لكارن وكنزي
ََمن البداية
حدوتة حلوة ع السمسمية
عن قطة حلوة وكلب حرامي
سارقين ياناس عنب بناتي
والفار مكشر فشار بيفشر
بيغني العنب والعنب بتاعي
سيبت الخناقة سخنة ياعم
والدم راشق فوق الجاكته
و البوكس جي الساعة ستة
دنيا مصالح ولا فيها صالح
والعم صالح ماشي يزعق
في كل حتة
وحد الدايم اصحى يانايم
على نغمة واحدة وم الساعة واحدة مسحراتي
بقول حكايتي ساعات حجازي وساعات بياتي
قالوا في الأمثال (امشي عدل يحتار عدوك فيك)
ونا اللي ماشية خطوتي زي السيف
لا اعرف ياناس في اللبط ولا العبط
ولا عمري قلت الزيف
وحد الدايم اصحى يانايم
رمضان كريم
ليست هناك تعليقات:
إرسال تعليق