★ أجمل نص يومي في القيم : بالزجل الغنائي المغربي ★
عرَف فِين تحُط رَجلِيك
علَم وَ وعَى يَا غَفَل
وَ عرَف فِين تحُط رَجلِيك
ركُوب لَموَاج مَاشِي سَاهَل
قَادَر لَبحَر يغَدرَك و يَدِيك
مَا تكُون ثبَن شَاعَل
وَ مَا تَتبَع لِي يَغوِيك
خَصَك تكُون مرَزَن عَاقَل
مَا تَلَف يَدِيك معَ رَجلِيك
دِيمَا مَا تكُون لَشَر فَاعَل
بَصٓدق نطَق الله يخَلِيك
لَخوَى لخَاوِي علِيك قِيلُو
مَا هُوَ طرِيق صَالَح
و سُوق لَفضَايَح لَا دَخلُو
جَوُو مضَبَب مَاشِي وَاضَح
تشَبَث بَلعَامَر مَاشِي بوَالُو
و كُون فَاطَن بَلحَق مسَلَح
رَا تَاجَر فَسُوق فجِيبُو مَالُو
بَايَع وَ شَارِي رَاجَع فَالَح
وَ لَمفَضِي جَاي جَار جلَالُو
تخَلَط عَندُو لَحلُو بَلمَالَح
رَا طُرُق عدِيدَة عرَف تَختَار
فَطرِيق صلَاحَك دِيمَا سِير
مَا تصَادَف غِير نَاس لَخيَار
هَل لَمحَبَة وَ كَثرَت لخِير
مَا تشُوف خسَارَة لَا عَار
معَاهُم غَتَعرَف آش دِير
وَ بَعَد مَن سوَاق لَشرَار
تعِيش سوَايَع لَهنَى وَ تِسِير
تَصلَح حيَاتَك مَا تَبقَى مَحتَار
وَ مَا غَيَضحَك علِيك لغِير ...
الشاعر و الزجال الغنائي و القاص
ذ . بلعباس المختار
ليست هناك تعليقات:
إرسال تعليق