الشاعر رضا البوشي
ما تطلبيش الانسحاب
ماتطلبيش من قلبي اللي حبك
في لحظة ضعف
انة يعلن الانسحاب
كل اللي داق الحب
وعدي عالاشواق
حب وياة العزاب
انا في هواك مسكت ايدية النجوم
مع اني عمري يدوب ييجي ألف يوم
انت الأميرة اللي ملكتي فؤادي
وانا الوردة اللي فتحها هواك
كل حاجة شفتها من يوم غرامك
لسة محفورة في عنية
كل كلمة وكل ضحكة وكل لمسة
جواها الف دنيا
ومين ينسى حلاوة حبنا اللي كان
الشمس صاحية ونام على خدها الزمان
َمن هوانا عدي الهوى ونام فوق البيبان
فما تطلبيش الانسحاب
ما تدخليش بيننا الظنون
دة حبنا لو حتى عش صغير
زي النسيم في الكون
ما تهربيش جوة البعاد
دة نا اللي شايفك
في العيون
ايوة بقولها لآخر نفس في قلبي
ان عيونك حتى رموشك
كل حبايبي
بكل الحروف اللي عرفتها واللي معرفتهاش
تندة عليكي الحروف وتقولك ياريت ترجعي
من يوم فراقنا لسة الدموع
بايتة فوق مضجعي
ما تفرحيش فينا الفراق
دة احنا اللي هزمنا الاشتياق
انا اللي اسمي في البطاقة
واحد من العشاق
الحب مش معلقة عسل
تنشرب بعد الفطار
الحب رعد وبرق مطر ربيع إعصار
اتنين عجايز مولعين في العتمة
الف نهار
فما تطلبيش الانسحاب
بحلفك بكل طلعة شمس عدت علينا
بكل الفرح اللي مرسوم فوق ايدينا
ما تضيعيش كل اللي باقي من عمرنا
ومافيش احلام بتعيش فوق السحاب
دة احنا يدوب سكة سفر بتضمنا
حرفين ملخبطين جوة كتاب
فما تطلبيش الانسحاب
ليست هناك تعليقات:
إرسال تعليق