ف ليل ملوش آخر
كُنت عايزني أقولك إيه
وأنا مش لاقي ف قلبك رحمه
سيبتلي ليل أتّعلق بيه
مّرمي جريح علي باب الضلمه
كلمه عشان صّدقتك بيها
حلم أمان العمر إتخان
إوعي تقول إن إنت بتعشق
أو بتفّرق أي حنان
إنت زمان بيعّلم ليلهُ
حُضن نجيلهُ إزاي يتخان
وأما تجيلهُ عيون قناديلهُ
يفرد ويلهُ علي الولهان
يشهق ليل لو حّس ملامهّ
تغرق ف بحورهُ الدّوامهّ
تفرق إيه إن سيبت علامه
بتشكي الجرح مع التوهان
ياما جريت أّحكي لأناتي
لما بكيت حزنان وب أهاتي
حتي آهاتي قالتلي يا ريت
ننسي ياريت وجع الأحزان
ونخلينا زمان الآتي
يمكن بكره علينا يواتي
وينّسينا عذاب وآهات
نعشق منهُ زمان مش آسي
ليله ب يوم أو حتي ساعات
حتي دقيقه أنا برضهُ راضيبها
تبقي لقلبي وقلبي حاببها
هيّه تداوي حكاوي ماشيبها
وأنا والروح ع الفرح نبات...!!!
شعر
صلاح محمود عفيفى
ليست هناك تعليقات:
إرسال تعليق