راس السنة بقلم مصطفى الجزار

 كل الحاجات الـمُحزِنة..

بتهُون في يوم راس السنة

وكأنه يوم ردّ الكرامة لكل واحد منّنا

وكأنه يوم..

حرّرنا فيه المُغتصَب مِن أرضنا

وكأنه يوم..

اتحوِّلِت أحلامنا مِن شيء مستحيل..

وبقت أخيرًا..... مُمكِنة!

وكأنه عصر جديد سعيد

مافيهوش سنين أحلام عجاف

ولا فيه سلاسل خانقة إيد مظلوم سجين..

بتقول له: "خاف"..

ولا فيه فقير..

مش لاقي لُقمة عيشُه حاف!

والبرد.. أتقَل م اللحاف

ينهش في طفل طريد شريد

فيموت بإحساسنا اللي أبرَد م الجليد

فنقول.... شهيد !!

علشان قلوبنا "المؤمنة"

تقفِل بيبان الـمَحزَنة

وتلمّ مِن صندوق زبالتنا الكبير:

"ضِحك السنة.. لِعب السنة.. رقص السنة"

وتقوم تغني وتحتفل..

وتقول بصوت مليان مياصة ودندنة:

أهلًا...

بيوم رأس السنة!

**************

✍️✍️✍️👇

مصطفى الجزار

ابوجلال ال موسى