سلام يا أمي
عارفه يامه وأنا قاعد جنب قبرك
كنت حاسس إنك إنتي لسه عايشه
وبتسمعيني
وإن إيدك جايه تمسح دمع عيني
ولما إتأكدت إنك مفارقه
وإن الدنيا بعدك ماعدتش فارقه
ماانتي كنتي ضي عيني
وكنتي وقت الضيقة يامه
بتواسيني
عارفه يامه
وأنا قاعد جنب قبرك
كان نفسي يامه تحضنيني
كل همي وانتي عايشه ماحستوش
عارفه ليه كان دعاكي لي مسند
عمري يامه مافقدتهوش
وعمري بعدك ماهحسبوش
كان توكالي بعد الله دعاكي
كان بيغفرلي عشانك
وكان حنانك مااوصفوش
كان بيرقيني ورب العزة يهديني
عشان رضاكي يجيني
عارفه يامه
كنتي لي أحن ضمة
عارفه يامه كنتي شمعة
في كل ضلمة
عارفه يامه
لو هينفع ترجعي وتاخدي عمري
اللي الباقي هبقي بيكي باقي
عارفك يامه
ماانتي عارفه ان ابنك
من غير وجودك هبقي ضايع
انتي الوحيدة اللي هتشتريني
في وسط زحمة وكله بايع
عارفه يامه
إني بعدك هبقي خايف
اي حب بعد حبك حب زايف
عارفه يامه جوايا جرح
بعد موتى ويوم سكوتي
هبقي ميت بجرح نازف
أوصيك يامه تبقى تاخدي
بإيدي يامه لما أبقي
بين إدين المولى واقف
سلام يأمي
في الجنة شايفك
وده دعائي لرب عالم
ورب شايف
سلام يا أمي
سيد حجازي
ليست هناك تعليقات:
إرسال تعليق