الصديق
قالوا زمان في الأمثال
الصديق وقت الضيق
وقالوا كمان يافرسان
احذر من عدوك مرة
والف مرة من الصديق
لو قلب عليك الصديق
هوا عالم بالمضرة
قفلت وداني للكلام
ورميت ورايا الأمثال
ولما الدنيا كشرت
قلبت عليا واتغيرت
والحياه بقت صعبة
والحالة عمالة تضيق
بصيت يميني وشمالي
ادور علي اصحابي وخلاني
والخمسين صديق
لقيت خيالات. عمالة تجري
والكل قال يافكيك
اصل الفقير ريحتة وحشة
لما الزمن علية يميل
والحالة علية تضيق
عرفت بس وقتها
مش اي حد يبقي صديق
مع اني كنت دايما معاهم
نعم الصديق وقت الضيق
فتحت وداني للكلام
ولملمت كمان الأمثال
لكن بعد . فوات الأوان
وقولت يارب يارحمن
انت اللي عالم بحالي
وكمان غني عن سؤالي
وانت الواحد الأحد
وانت الصاحب والسند
وانت الصديق وقت الفرج والضيق
يارب فرج كربتي
ويارب راضي بحكمتك
بس اسألك
لا تشمت فيا عدو
ولا حتى اقرب صديق
بقلم
احمد محمود
من ديوان حبة رتوش
ليست هناك تعليقات:
إرسال تعليق