انت مين ياعم
انت واحد مننا
ولا من زمن الأنبياء
ولا من الأولياء الصالحين
قولي انت مين
شيلت شيله تقيله
ومعاها أخطاء السنين
بتبني وتعمر وتخضر
وبيقولوا ايام زي. الطين
وأنت قبلت التحدي
وقولت وحياتك يا بلدي
هخلي رأسك
بين الأمم مرفوعة
وعمر ولادك
ما يشتكوا من الجوعه
ورجع اللي اتسرق
من آلاف السنين
انت مين ياعم
انت واحد مننا
ولا من زمن الأنبياء
ولا من الأولياء الصالحين
احمد محمود
********************************
في 2020 كتبت وقولت
انت صح
واخترت الطريق الصعب
نبني بلدنا بأيدينا
بس صعبتها قوي علينا
اقسم بالله تعبنا
ومش شايلانا رجلينا
انت ما بتتعبش
ولا انت مش زيينا
الفقر والغلا والجوع
نخروا عظامنا
وزادوا قوي علينا
عظم الفقير انطحن
ومافيش حاجه في ايدينا
طب خد استراحة محارب
ننشف حتي عرقنا
ونمسح تراب الشقي بأيدينا
تمن سنين أشغال وشقي
والله كتير علينا
بلدنا كتير اتغيرت
وده شايفينه بعنينا
ياللي بتسابق الزمن
حن شويه علينا
وعشمنا في ربنا كبير
يعود بالخير علينا
بس احلفك بالله
ياللي قولت انتوا نور عنينا
خلي بالك مننا
وحن بقي علينا
بقلم
احمد محمود
*********************************
في 2022 كتبت وقولت
الجوع كافر
وأحنا اللي صدقناك
وبقلوبنا وقفنا معاك
وبقالنا سنين عايشين
متحملين و بنعافر
لكن خلاص تعبنا
الصحة ما متحملاش
عضم الفقير انطحن
والمعده ماصبراش
شغل مافيش
فلوس ماعنديش
وانا عاوز اعيش
شوفولنا حل يااخوالنا
مافيش حاجة ببلاش
والعيشة بقت نار
من جشع التجار
ولا حد حاسس بينا
وعندي اورطة عيال
معدتها ما سكتاش
طب قولي اعمل ايه
اعمل زي اللي عملوا
وبقوا كتير قوي
اتاجر في الممنوع
وتمسكونا وتعلقونا
وتحاكمونا وتحبسونا
طيب والله فكرة
اسجنونا الأكل هناك ببلاش
ولا اقولك موتونا
احنا كده كده ميتين
هي دي عيشة
طيب عندي فكرة حلوه
موتونا و قطعونا
وصدرونا قطع غيار
ويبقي عندنا ماركة
وهانتباع بالدولار
ويبقي لحمنا غالي
وما راحش ببلاش
حسوا بينا بقي
دي الرحمة تجوز علينا
وياريت ما تنسوناش
دا الجوع كافر
بقلم
احمد محمود
******************************
في 2024 اتمني ارجع واكتب
انت مين ياعم انت واحد مننا ولا من زمن الأنبياء ولا من الأولياء الصالحين
ليست هناك تعليقات:
إرسال تعليق